За да не се создава метеж во училиштата при уписите на ученици во прва година, уписните рокови се продолжени за неколку дена, од денес до петок (16,17,18 и 19 јуни), а при подигањето на свидетелствата од основните училишта, на учениците им се даваат и пријави за во средно.  

„Уписите на учениците се намерно продолжени во повеќе денови. Пратени се насоки во училиштата, посебно во оние каде бројот на ученици во изминатите години бил поголем од бројот предвиден во конкурсите, тие уписи да траат наместо два четири дена. Резултатите за учениците кои се запишуваат во средните училишта во прва година ќе бидат истакнати после 15 часот во петок за сите средни училишта. Училиштата имаа задача да подготват по азбучен ред по презимињата на учениците списоци на вратите од училиштата, а медиумите да помогнат на локално ниво со објавување за да не се создава метеж во еден ден пред училиштата. Сите четири дена од уписите подеднакво е правото на ученикот да конкурирта. Дали ќе ги достави документите првиот или последниот ден рангирањето ќе се споведува дури во петок по завршување на уписите“, рече заменик министерката за образование Елизабета Наумовска. 

Градоначалничката на Битола Наташа Петровска упати апел учениците пријавите да ги пополнат во нивните домови за да не се создава метеж на местата каде ги доставуваат во средните училишта.