Интензивно се работи на реконструкцијата на патниот правец од селото Кажани кон селото Маловишта, во должина од 4 километри.Патот на одредени делници се проширува, а во моментов се извршува финалната фаза на тампонирање и нагазување на теренот, пред асфалтирање.

Градоначалничката на Општина Битола денеска изврши увид во градежните активности на изведба на овој проект, за кој општината ја изготви планската документација, беа донесени oдлуки на седници на Совет, a кофинансирачкиот дел на општината изнесува над 2.300.000 денари.

Патниот правец Кажани-Маловиште се реконструира преку Програмата за рурален развој, со средства во висина од 16,3 милиони денари. Важноста на добар патен правец кон ова село, кое е единствено сместено на територијата на Националниот парк „Пелистер“, се однесува на развивање на руралниот туризам, а истовремено и заштита на културно-историските споменици.