Големи дупки како кратери се имаат појавено низ единствениот асфалтен пат низ Националниот парк Пелистер. По 74 години од неговото прогласување за прв национален парк во земјава, тој опстојува со стар и со години нерехабилитиран пат.

Збунувачко е тоа што не се знае под чија надлежност е единствениот асфалтен пат во паркот. На официјалната картата од Јавното претпријатие за државни патишта го нема. Како регионални се исцртани земјени или планинарски патишта. Едниот Р 2331 Ниже Поле-Пелистер-Брајчино –Љубојно на картата е испрекинат зашто таква асфалтирана делница не постои. Другиот е Р 29372 од Ротино до Десткото одморалиште што исто така е земјен и само дел асфалтиран.

Во вакви услови нема ни најава за скора реконструкција на овој пат. За истиот проблем со патот централната и локалната власт во текот на зимата изјавија дека можат да помогнат во негова обнова, но не се надлежни.

„Во 2021 година извршивме рехабилитација на патот Битола –Ниже Поле со 24 милиони данари и оваа година продолжуваме со оној дел што е регионален патен правец. Се она што е оставено како локален пат и е така нотирано, ингеренциите се општински“ , изјави тогаш министерот за транспорт Благој Бочварски.

Од Општина Битола тогаш рекоа дека имаат надлежност за одржување на патната инфраструктура која поминува низ населените места, поради тоа вложуваат во  Потпелистерието. И тие посочуија дека учествувале во изведба на истипт пат од Ниже Поле до Подпелистерието и дека работат на проектна документација за реконструкција на патот до спојот со Паркот.