Рибите со кои планинари пред неколку децении вештачки го порибиле Големо Езеро на Пелистер, без да проценат дека можеби ќе предизвикаат штета, сега го загрозува ендемското ракче кое живее во водите на ова глацијално езеро, велат нуркачите кои реалзиирале неколку нуркачки експедиции во ова езеро.

-Потребно е да се изнајде начин и да се воспостави повтроно потребниот природен баланс, затоа што ендемскиот рак на Големо Езеро е загрозен, вели Александар Ацев, познат битолски нуркач член на Спелеонурккачкиот клуб „Врело“.

Четворица нуркачи од овој клуб деновиве остварија трета нуркачка експедиција на Големо Езеро. По првата, во 2012 година која била и истражувачка, нуркачите велат дека секоја следна е голем предизвик за нив, а нуркањето возбудливо.

-Ова алтитудно нуркање бара посебна подготвеност. Големото Езеро е на надморска височина од 2218 метри, имаме процес на аклиматизација, кислородот е поредок, а предизвикот голем, вели Ацев, кој беше дел од оваа експедиција на Големо Езеро

Најголемата длабочина на Големо Езеро е 14,5 метри, а видливоста која зависи од временските прилики, овој пат била 3-4 метри, но може да и помала, доколку времто е облачно или дува ветер. Веќе е познато дека езерото на дното чува остатоци од оружје од двете светски војни.

-На дното има бомби, гранати, шлемови, муниција и други предмети  од Првата и Втората светска војна. Интересно е што има и остатоци од шишиња од вино што го носеле француските војници. Овие предмети остануваат на дното, затоа е што се опасни и не смеат да се допираат, вели Ацев.

Првата експедиција во 2012 година била и истражувачка во соработка со Природно математичкиот факултет од Скопје,  со цел да се земат податоци за седиментацијата и примероци од водата на Големо Езеро, при што биле пронајдени и остатоците од двете светски војни.

Споделуваме исклучителни фотографии од Спелонуркачкиот клуб „Врело“ направени при нуркачката експедиција на Големо Езеро на Пелистер кое е на надморска височина од 2218 метри