АПЛА.MK Преземањето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира.
Новиот градоначалник Тони Коњановски со неговите соработници дојдоа пеш на примопредавањето на функцијата во Општина Битола.
Во Општината беше пречекан со аплаузи од дел од вработените.
Во градоначалничкиот кабинет влезе со букет црвени ружи кој ѝ ги подари на Петровска.
Прв разговор со екс градоначалничката Наташа Петровска во градоначалничкиот кабинет
Тимот на Коњановски: Борче Димитровски, Пеце Милевски и Викторија Христовска
,,На мојот наследник му оставам стабилна финансиска општина со 4.2 милиони евра за разлика од мене која наследив долгови. Не можам да му оставам картичка за ручеци зашто никогаш не сум ја имала, и она што како ексклузивитет сум го имала во изминатиот период, а тоа е користењето на сопствено возило за доаѓање на работа и движењето пеш без телохранители", рече Петровска.
Таа рече дека од тие 4.2 милиони евра што ги остата, во најголем дел се пари за да се довршат проектите кои ги започнала, а за кои има склучени договори, некои се во изведба, а други пред воведување во работа. Од продажба на градежно земјите што го извршиле, во следниот период треба да влезат дополнителни 2 милиони евра во буџетот на Општината.
,,На сите кои се занимаваат со политика им порачувам да имаат мудрост покрај здравје, таа е многу битна кога носите одлуки кои и тоа како влијаат врз животот на останатите за кои ги водите политиките", рече Петровска и додаде дека стои на располагање со своето искуство во водењето на Општината да му помогне на идниот градоначалник.
,,Ќе настојувам да ги продолжам проектите кои се во реализација. Искуствата на Петровска што ги имаше во 4 годишното работење ќе настојувам да ги применам и нема да се ограничувам да се слушнеме, да се консултираме. Тоа доликува на цивилизирани граѓани и Битола само така ја препознавам како град во кој сите треба да живееме. Од вработените очекувам поддршка и многу работа без делби и фаворизирање. Ќе ја користам помошта на секој што е стручен и има знаење", рече Коњановски.
Петровска му подари информатор-отчет за сработеното, печатено издание до 96 страници за се што сработила во изминатите 4 години, пенкало за да потпишува добри договори за Општина Битола и клучевите од кабинетот.
