„Во прва задача ги истражиме државите во кои работат најдобрите наставници во светот. Потоа воведовме делови од светот во нашата училница со тоа што преку истражување се запознавме со знаменитостите на Италија, Мексико, Турција, Австралија, Индија, Бразил, Норвешка, Словенија, Белгија, Шпанија. Третата задача ‘Kнига со волшебни зборови’ за нас беше вистински предизвик да ги преведуваме волшебните зборови: здраво, повели, молам, извини, благодарам, пријатно, те сакам на различни светски јазици“, вели наставничката Весна Гагаловска од ОУ „Тодор Ангелевски“.

Од истото училиште во проектот беа вклучени и наставниците Јагода Мамузиќ, Лидија Стерјов, Татјана Чапкуновска, Слаџана Бојаџиева, Мирјана Кимева, Бисера А.Петровска, Гордана Георгиевска, Снежана Тасевска и нивните ученици. Активностите што го спроведоа имаа основна цел запознавање со културата, обичаите и останатите карактеристики на државите учеснички во овој проект и прифаќање на разликите.

„На интернет подготвиваме и таканаречена ‘Волшебна мапа на светот’, во која со голем интерес учениците истражуваа за континентите и ги бележеа нивните знаменитости, така беа направени повеќе мапи со поврзување на истражуваните континенти. Големиот предизвик беше учениците да направат мапа и со нашиот град. Потоа следуваше ‘Наша волшебна мапа на пријателство’ па комуницираа со другарчиња од други држави по пат на допишување со писма, е- маил, скајп, вибер, месинџер при што стекнавме многу нови пријателства за кои веруваме дека ќе се негуваат и во иднина’, додаде Гагаловска.

Голем интерес кај учениците предизвика и пишувањето на писма до непознато другарче, пракса што се применуваше пред дваесетина години, а во последните години изумре.

„Учениците беа многу задоволни, отидовме на пошта и ги пуштивме писмата. Тие самите ги ги адресираа до непознато другарче, по број во дневникот. Многу од децата одамна немаа пуштено честитка и писмо, а некои воопшто немаа влезено во пошта, па учевме како да се адресираат, на која страна. Ова им беше многу интересно, ги украсуваа писмата, ги лепеа, адресираа и беа многу радосни“, велат наставниците.

Целата акција доби и хуманитарна мисија. Учесниците изработија перничиња со апликации на странски држави, а од собраните средства донираа прибор според потребите на „Порака“ Битола- Здружение за подршка на лица со интелектуална попреченост. Во соработка со наставничките Сузана Малчева од OУ ”Гоце Делчев” – Неготино и “Даниела Ѓорѓиовска” од ОУ “Joaким Крчовски” – Кр. Паланка се изврши и донација за Нина Димитриовска.

„Среќни сме и веруваме дека успеавме да исплетеме доволно силна пријателска мрежа и дека со своите нови другарчиња ќе останеме во контакт и во иднина, дека еден ден не само виртуелно ќе се сретнеме и реално, заедно ќе се дружиме, ќе се радуваме, ќе соработуваме“, велат учесниците во прокетот.