Младински предизвик на фестивалот „Битола отворен град 2018“. Битолчани имаат можност да освојат три бесплатни влезници за познатиот европски музички фестивал EXIT 2018 што од  12 до 15 јули се одржува во Нови Сад, Србија.

Она што треба да го направат е да соберете тим од тројца, да пронајдат три симболи на OPENS2019 (Европска младинска престолнина 2019) прикажани на фотографиите, во три различни кафичи на Широк Сокак и во центарот на Битола. Да направат три фотографии од тимот со симболите и да ги објават јавно на нивниот Facebook и/или Instagram профил со употреба на хаштаг #opens2019 и #bitolaotvorengrad и да ја тагнат Facebook страницата на MKC Bitola

Учесниците да имаат над 18 години.

Старт 11.00 часот среда 27 јуни 2018. Најбрзиот и најснаодливиот тим кој ќе го исполни предизвикот, ќе добие три влезници за EXIT2018!

Победничкиот тим ќе биде прогласен на вечерашната јавна дебата во 19 часот во МКЦ-Битола.

Повеќе битолски семејства од населбата зад Здравствениот дом, Баирот и Ушици вечерва околу полноќ останаа половина час без струја. Прекинот во снабдувањето со електрична енергија траеше од 23,50 до 25 минути по полноќ. И од Контакт центарот на ЕВН известија дека без струја се Битола, и тоа делови од централното градско подрачје и Новаци. Од ЕВН рекоа дека нивни тимови веќе се ангажирани за непречено снабдување со електрична енергија во овие реони.

Општина Битола подготви проект со кој ќе  аплицира до ИПА 2 фондот на Европската Унија за добивање на грант кој планира да го искористи за реставрирање на Офицерскиот дом. Проектот е насловен „Зголемена туристичка понуда на Пелагонискиот регион преку реставрирање и адаптирање на Офицерскиот дом заедно со партерно уредување. Доколку се одобри апликацијата, Општината ќе добие над 71 милион денари, а сама ќе мора да кофинансира десет проценти од износот. На денешаната седница, советниците дадоа согласност Општината да учествува во проектот со 7,6 милиони денари. Доколку им го прифатат проектот,  Офицерскиот дом ќе треба да се реставрира до крајот на 2019 година..

Цената на водата и таксата за канализација поскапеа во просек за 10 проценти. Водата за 2018 година  за домаќинствата од 24, 25 денари по метар кубен поскапува на 27 денари, поточно за 2, 75 денари. За индустријата од 45 денари на 47, 80. Сметката за Нискиградба  поскапува за 1,34 денари за домаќинствата, односно ако досега се плаќаше 10,55 сега ќе се плаќа 11, 89 денари. За претпријатијатаод 15, 83  на 17, 24 денари. .

Оваа генерација на битолски планинари од ПСК „Пелистер“ и покрај тоа што поседуваат неспорен правен континуитет и целосна документација за имотот на клубот, не се сопственици во смисол на кој што некои го посакуваат, туку само негови чувари. Вистинските сопственици се генерациите пред нас, сегашните, но и идните генерации планинари и граѓаните на Битола. Ова е дел од соопштението што ПСК „Пелистер“ го испрати до медиумите по вревата што се крена во јавноста околу обновата и приватизацијата на домот. Имено, пред три недели клубот започна со работна акција за обнова на домот, а Општината соопшти дека ќе обезбедат 100 000 евра за „Копанки“ но доколку им се даде сопственоста зашто не можат да вложуваат во туѓ имот. Потоа се појавија други здруженија и поединци кои побараа ревизија на приватизацијата на „Копанки“.

Испраќањето на картички по пошта се враќа во мода барем кога се во прашање уметниците. Доказ за тоа е изложбата на поштенски мејл арт картички пред Офицерскиот дом во Битола со која започна 17 издание на фестивалот „Битола отворен град“ во организација на МКЦ –Битола.

Култниот белградски алтернативен рок бенд „С.А.Р.С.“ оваа година е главна ѕвезда на 17-то издание на фестивалот „Битола отворен град 2018“ во организација на Младинскиот културен центар од Битола што ќе се одржи од 25 до 30 јуни во Битола. Големиот концерт ќе се одржи на плоштадот Гоце Делчев овој четврток со почеток од 22 часот.

Здружението за меѓународна младинска соработка Интерактив од Битола заедно со своите членови и волонтери како и соработниците и поддржувачите го одбележаа 1. роденден во амбиентот на кафе Бар Чаршија. Интерактив е граѓанска младинска организација која има за цел да обезбеди можности за локалната младина но и соработка со младите на меѓународно ниво. Целта на здружението е да развива активности и можности за младите во сферата на неформалното образование, промовирање на здрави животни навики, културата и уметноста како и граѓанско општество кои ги поттикнуваат позитивните вредности кај младите луѓе.

„ Активноста на организацијата се фокусира на многу аспекти кои се од интерес за младите: од обезбедување на услуги и информации, до истражување и поддршка за креирање политики и мрежно поврзување. Интерактив работи на создавање на различни одговорни и кооперативни заедници каде што граѓаните активно придонесуваат за социјалниот развој и интеграција. Нашата мисија е да обезбедиме одржлив развој на заедницата преку создавање на можности за квалитетно ангажирање на граѓанското општество, унапредување на можностите за учење и активно вклучување на младите луѓе и другите граѓани.“ – изјави Мартин Николовски, претседател на здружението.

Николовски додава дека и покрај тоа што Интерактив постои само една година, од самото основање здружението реализирано повеќе активности и проекти како на локално така и на меѓународно ниво.

„Иако Интерактив слави само една година од своето постоење, морам да истакнам дека сум горд што сум претседател на ова здружение. Во Интерактив членуваат повеќе од триесет млади но и возрасни од Битола. Во текот на оваа година нашите членови и волонтери учество зедоја на повеќе од 20 обуки во Република Македонија, остваривме две меѓународни младински размени во Анкара и Анталија во Република Турција, потпишавме меморандуми за соработки со 10 граѓански здруженија од нашата земја, како и две надвор од границите на државата. Имаме соработка со медиуми, локални самоуправи, а од неодамна Интерактив стана придружна членка и на Коалиција на младински организации СЕГА од Прилеп“ – изјави Николовски.

Неформалното образование е особено важно за развојот на младите, а младите се тие кои што го претставуваат најдобриот скенер за откривање на вистинските проблеми што постојат во општеството. Со некои насоки тие можат да го откријат коренот на проблемот и да го изградат својот пат за да најдат трајно решение за да се ослободат од проблемот. Интеракив како организација е мотивирана да работи со младите. Тимот на Интерактив се состои од искусни младински работници и млади волонтери, кои се големи ентузијасти, креативни, мотивирани, активни, иницијативни млади луѓе.

Здружението Интерактив од Битола на младите им дава можности да се вклучат, да промовираат неформално образование, мултикултурализам, потреба од самовклучување и активно граѓанство, како и зајакнување на капацитетите на младите во локалната средина.

Професорката Елизабета Попова Рамова која пред десетина дена доби отказно решение од Високата медицинска школа,  ја доби правната битка. Управниот суд, одлучувајќи по нејзина тужба  ја поништи одлуката со која ѝ беше одземено професорското звање од страна на Високата медицинска школа. Попова Рамова иако беше носител на студиската насока за физикална медицина  беше  отпуштена од работа откако Просветниот инспекторат постапувајќи по пријава за плагијат побара од Високата медицинска школа во Битола да ѝ го поништи звањето професор.

Битолчанецот Томе Ѓорѓиевски има телесен инвалидитет и низ Битола се движи со специјализирано моторче. Но, ретко успева да го паркира на места наменети за возила во сопственост на инвалиди. Приодите до тие места често пати се блокирани со други возила.

„На места каде што има паркинзи за инвалиди, пречки има на приодите. Паркирани коли да не можеш да поминеш. Пред некој ден кај трговската куќа Јавор во центарот на Битола имаше паркирано возило и полицијата тука беше. Им реков на тие од полиција вака не смеат да се паркираат. Ми рекоа дека несовесни граѓани биле. Па, пиши им пријава ако се несвесни тие, бидете вие свесни“, рече Ѓоргиевски.

Тој денес учествуваше во дефилето на инвалидизираните лица низ Широк Сокак. Дефилето во организацина на „Мобилност Битола“ се одржа традиционално по 12 пат,а целта беше да се влијае врз општеството за остварување на правата на лицата со инавлидност.

„Уште во зграда се соочувам со бариера, нема пристапна рампа. Секој ден слегувам со помош на маж ми и ќерка ми. Сакаме да прошетаме, не се живее по цел ден затворен во стан. Болницата е достапна, а другите места не. Аптеките се недостапни. Кај матичниот лекар нема пристапна рампа“, се пожали битолчанката Олгица Огненовска.

На дефилето се приклучи и градоначалничката Наташа Петровска која изјави дека ќе работат на остранување на бариерите кои ја попречуваат мобилноста на оваа категорија на сограѓани.

„Настојувам во нашите средби да таргетираме точно каде се проблематичните точки кои ја попречуваат мобилноста на нашите сограѓани и истите да бидат вградени во програми и во инфраструктурни зафати на Општината како би се реализирале. Би била пресреќна доколку ова успееме да го мапираме и овозможиме уште со ребалансот на буџетот“, рече Петровска.

Проф. д-р Марјан Танушевски, претседател на Македонското научно друштво од Битола, одржа предавање на тема „Лобираме заедно“ при што истакна дека порано архитектонските бариери беа најголем проблем, сега се повеќе е човековиот ум како бариера, односно разбирањето на потребата за да им се помогне на лицата со инвалидитет зашто тоа не треба да биде потреба туку култура на однесување.

„Денес ќе го промовирам универзалниот дизајн што е поткрепа на идејата за култура на однесување и начинот како да им се помогне на овие лица. И ќе ја промовирам Стратегијата за рамноправна поддршка на лицата со инвалидитет со јавните власти која ја има веќе усвоено градот Загреб и мислам дека е лесно применлива во нашиот град и држава“, рече Танушевски.