Во рамките на „Европската недела на мобилност" денеска  во Техничкиот факултет во Битола, во организација на Општинскиот совет за безбедност на сообраќајот на патиштата, а во координација со Општина Битола, заедно со Црвен Крст Битола и граѓански иницијативи беше промовирана новоформираната студентска сообраќајна единица.

-Улогата на сообраќајната единица е разгледување и давање на предлози поврзани со сообраќајот, сообраќајните проблеми со кои секојдневно се соочуваат граѓаните, решавање на одредени сообраќајни проблеми, размена на идеи преку различни активности и слично. На промоцијата учествуваа претставници на СВР Битола, Отсекот за превенција при СВР Битола и на Полициската станица за безбедност на патниот сообракај при СВР Битола, со што уште еднаш потврдија дека ги поддржуваат идеите и активностите на Општинскиот совет за безбедност на сообраќајот на патиштата и дека земаат активно учество во нивна реализација, информираат од СВР-Битола.