Адаптацијата на касарната во нова урбана средина во два мандата ја најавуваше Талески, ветувајќи градинки, цркви, продавници за населението и сѐ што е потребно за секојдневно функционирање, а не ги одмина ниту хациендите. Дури ова лето таму се асфалтираа и инфраструктурно се уредуваа три улици, кои имаат пристап најмногу до колективните згради. Сопствениците на плацеви за индивидуални куќи и по толку години сѐ уште немаат секундарна улична мрежа.Улици нема и за дел од зградите, па станарите поминуваат низ кал и низ темни патеки, иако голем дел од дрвјата се откорнати и сѐ уште се сечат со тој изговор.

Она што ги интересира битолчани, особено станарите на оваа населба е –зошто локалната власт во Битола,  не успеа инфраструктурно да ја уреди касарната, и покрај тоа што собра милиони евра од комуналии од инвеститорите ?

Од тоа како изгледа поранешната касарна  по се изгледа не е задоволен ниту еден од најблиските соработници на Талески, Зоран Илиоски, кандидат за градоначалник на ВМРО-ДПМНЕ, во Битола.

Илиоски, после толку години владеење на Талески денови во предизборните настапи , на лице место од битолската касара најави дека  „Златен рид“во наредните четири години ќе добие градежна експазија,ако евентуално тој победи на престојните локални избори.

-Ќе изградиме и асфалтираме уште три нови улици, а ќе биде изградена и атмосферска канализација за 13 улици, во вкупна вредност од 53.000.000 денари. За блоковите АРМ 1 и АРМ 2 предвидуваме и изградба на нова нисконапонска кабловска мрежа и улично осветлување во вредност од 7.350.000 денари, вети Илиоски.

Кандидатот на ВМРО-ДПМНЕ не застана тука со ветувањето, отиде подалеку и вчера се досети да најави дека во старата битолска касарна ќе направиме парцели од по 200 метри квадратни кои без пари ќе им ги даде на младите битолчани и целосно ќе ги ослободи од плаќање комуналии за да можат да изградат евтини куќи под многу поволни услови.

-Без давачките кон Општината – една куќа од 50 до 100 квадрати младите идни смејства ќе ги чини од 17 до 35 илјади евра . Ова е пресметано, планирано, конкретно и остварливо – евтин дом за секое ново семејство во Битола“, рече Илиоски.

Сепак кандидатот иако се покажа вешт во преметките со евра, не кажа колку пари, локалната власт на ВМРО-ДПМНЕ во Битола потрошила за урбанизација на поранешната касарна, колку собрала од инвеститорите, зошто ги пренаменила во индустриската зона „Жабени“ и за колку пари со камати  ги задолжи битолчани за „Златен рид“. Ова дотолку повеќе ако  се знае дека Општината од комуналии од инвеститорите собра 5, 2 милиони евра , а инвестираше само два милиони евра , и  згора на се зеде кредит од 1,5 милиони евра, битолчани да го враќаат  до 2030 година.