Јасмина Василевски од Битола позната по брендот „3/4 од Јасмина“ ја претстави својата најнова колекција „Етно 3/4“ , уникатна и импресивна по многу нешта со безвременски модели.

Навидум како сказна, Василевски ги оживеа модните достигнувања во градот на конзулите од крајот на 19 век и почетокот на 20 век, „ала турка“ и „ала франга“, период пресвртница во модните текови не само во градот туку воопшто во европската мода, градејќи сега нов етно имиџ.

На модната презентација во Пациото на Завод и музеј Битола или познато како старата турска касарна, Василевски понуди нови обликувани модни парчиња и на современите кроеви и материјали суптилно вметна елементи од чипка, плетиво и делови од народна носија, алово црвена престилка...своевремено фундаменти на градската облека.

„Во моделите имплементирав и парчиња од оригинални везови од крајот на 18 и почетокот на 19 век, кои носат посебна емоција и историја. Додатоци извадени од ковчег на кој им дадов нов живот!“, вели Василевски.

По само пет години работа на модниот бренд,  „3/4 од Јасмина“ веќе прераснува во еден нов занаетчиски еснаф во градот, терзија, која се издвојува од останатите. Таа умешно ја вметнува срмата во новата „ала турка“ колекција, а на модели кои асоцираат на „ала франга“ им дава асоцијативна форма и естетика, со нов крој и материјали.

„Од секогаш сум ја сакала оваа мода. Јас сум растена на таков начин. Мојата баба Димитра, ја гледам на фотографија …косата ја обликувала со шеќерна вода и загреана маша… Бел вез на неа … прстен на малото прсте (нешто што и јас секогаш го носам) ми недостига тој достоинствен стил на отменост и смелост во исто време. Тоа е мојата цел… да го наметнам тоа со новата колекција ‘Етно 3/4 ’. Да ги оживеам овие стилови и да ги претставам на младите генерации, кои малку знаат за овој важен дел од нашата историја. Всушност покажав дека историјата може да се претстави на модерен и атрактивен начин. Елементите што ги внесов не само што не го оптоваруваат моделот, туку го збогатуваат и го прават посебен“, раскажува Јасмина за мотивите, деликатните кроеви и богатата рачна изработка во новата колекција.

Колекцијата е продажна, и најголем дел од неа е распродадена.

Модел бр. 1. Дводелен комплет во стилот на А ла Франга ... изработен од плиш со елементи на бел вез кој во 18 и 19 век во Битола претставува фундамент на градската облека.

* Модел број 2. Комплет составен од блуза и сукња-пантолон изработен од тафт во стилот на А ла Турка , каде се вметнува богата чипка со ефект на срма.

*Модел бр. 3. Комфорна кошула/фустан ... изработен од сатенски памук и етно елементи ... споени во еден смел и отмен модел.

*Во моделот број 4 … акцентот се става на оригиналниот колан , составен дел од пелагониска народна носија ...со додадени етно елементи и алки, врз раскошниот модел на сукња- пантолот.

*Модел бр.5. Долг елек џубе во стилот на А ла Турка, рачно украсен со срмени елементи.

*Модел бр.6. Елек со асиметрични јаки, со рачно имплементирани срмени елементи А ла Турка на левата страна.

*Модел бр.7. Кошула изработена од крут памук , украсена со богата црна чипка... карактеристична за стилот на А ла Франга

*Модел бр.8 Ленена сукња со рачно имплементирана црна чипка .... која раскошно го доловува стилот на А ла Франга.

*Модел бр.9 Сукња и шал изработени од волнена чоја со оригинални елементи од смилевски вез, дел од ракав на женска кошула. И последен ...

модел бр.10 ... 3/4 палто изработено од волнена чоја, со оригинални мотиви на крстови, околник …бочници. Везови кои се носеле во најважните моменти во животот.

А. Блажевска