Министерката за култура Бисера Костадиновска-Стојчевска вечерва се обрати на 15-то по ред издание на Фестивалот на музика од светот, кој годинава се одржува под мотото „Една сцена, звук на светот“. Таа од организаторите на фестивалот беше најавена не само како личност која е најсилно врзана со културниот развој во нашата земја, туку и како визионер кој верува во моќта на уметноста и на културата дека можат да ги трансформираат општествата. 

Костадиновска-Стојчевска во својот говор кажа дека е горда што Битола преку овој фестивал и придружната програма покажува подготвеност на високо ниво да се вклучи во европските процеси на поддршка на младите локални автори, и да ги поврзе националната со независната сцена.

Ќе има ли поскапување на цената на водата во Битола и од што ќе зависи формирањето на новата цена се огласи и ЈП „Стрежево“ Битола. Цената на водата за пиење во Битола зависи од одлуката на Регулаторна, но и од цената која Владата ќе ја утврди за Хидросистемот „Стрежево“ Битола од каде „Водовод“ во сушниот период купува сурова вода. И за „Стрежево“ и за „Водовод“ се чека одлука.

Зголемен е бројот на прегледи на пациенти со вирусни заболувања на Инфективното одделение при Клиничката болница со Битола,како и на Одделот за интерни болести каде дел од лицата што побарале лекарска помош имале инфективни заболувања.

Во 2,20 часот по полноќ малолетничка од Охрид, со привремен престој во Битола, пријавила дека пред угостителски објект на улица „Партизанска“ во Битола била физички нападната од друга малолетничка од Кавадарци, исто така, со привремен престој во Битола, која употребила и стаклен предмет, соопштија од СВР Битола. Од таму велат дека се преземаат мерки за расчистување на настанот.

Според наши проверени извори, се работи за средношколки кои престојуваат во интернат во Битола. Едната при нападот употребила шише и ѝ нанела расекотина на челото на другото девојче.

По повод 20 ноември, Светскиот ден на правата на децата, Комисијата за образование при ОО СДСМ Битола организираше трибина заедно со комисиите за образование од Пелагонискиот регион и Централната комисија на тема ,,Да градиме здрави генерации -заедно против меѓуврсничкото насилство".

Албанскиот претседател Бајрам Бегај при посетата на Битола по повод 115 годишнината од унифицирањето на албанската азбука рече дека е оптимист за евроинтеграцијата на двете држави, Македонија и Албанија, и покрај грчката најава за вето на нивната држава и бугарското вето за Македонија. 

 ,,По природа сум оптимист и треба да гледаме оптимистички. Како што пред 115 години нашите преродбеници биле оптимисти, така и ние треба да бидеме. Го посакувам најдоброто за нашите два народа во еден најкраток можен пат кон ЕУ и едно поубаво утре за нашите деца со просперитет и мир во регионот", рече Бегај. 

Тој изрази благодарност до властите што Денот на албанската азбука 22 Ноември е прогласен  за национален празник што покажува за добрите меѓусоседски односи  и дека соседите треба да се почитуваат меѓусебе и симболите на народите. 

Конзулот на Албанија во Македонија Имет Селмани рече дека треба не само од симболичен аспект, туку од суштински да станеме Европјани  и да ги воведеме европските стандарди. 

,,Идејата е не само во ноември туку и во текотна цела година Битола да биде дестинација на туризмот каде од Косово, Албанија, Прешево, Црна Гора и секаде каде живеат Албанци да дојдат тука да го посетат градот, во еден космополитски градот да го почувствуваат духот на минатото , но и толеранцијата и соживотот на денешницата", рече Селмани. 

Во рамките на проектот „Идентификација и следење на талентирани и надарени студенти“, Битолскиот универзитет ги избра четворицата таленти: Тамара Тасеска од Економскиот факултет во Прилеп, Софи Гајтановска од Факултетот за информатички и комуникациски технологии, Кристијан Велјановски од Факултетот за биотехнички науки и Дејан Петровски од Педагошкиот факултет.