Клиничката болница од Битола за потребите на пациентите на Очното одделение од сопствени средства набави најнов апарат за оптичка кохерентна томографија со OCT ангиографија за испитување на задниот сегмент на окото.

„Ова е најнов апарат, прв во јавното здравство во нашата земја и пошироко. Процедурата е неинванзивна и краткотрајна. Со ова на Очното одделение се отвора нов кабинет за компјутерска томографија во кој од август ќе работи обучен кадар по сите светски стандарди“, изјави за Апла.мк портпаролката на болницата, Сузана Конеска.

Траги од мечка се забележани над битолската населба Стрчин. Жители за Апла.мк раскажуваат дека ја виделе мечката со мало мече. Велат дека скоро секоја вечер слегува по ридот, во близина на населбата, во потрага по храна. Во околината има пчеларник, па  стопанот за да ја набрка палел и оган. Но, попусто, мечката навраќа скоро секоја вечер. Планинари ја виделе како минува и кај каналот над месноста Смолево. Со години законот ја заштитува мечката од лов, па многу е намножена во планинските предели. 

Македонија е нашето име и нашиот код, затоа го повикувам народот и понатаму да продолжи нашата земја да ја вика Македонија, рече лидерот на ВМРО-ДПМНЕ, Христијан Мицкоски, на денешниот протест во Битола организиран против потпишувањето на договорот за промена на името.

Договорот за името денес ќе биде потпишан во село Нивици (Псаридис) во Грција на брегот на Преспанското Езеро. Потпис на договорот за решавање на долгогодишниот спор со името ќе стават шефовите на дипломатиите на Македонија и Грција, Никола Димитров и Никос Коѕијас. Со договорот официјалното име за севкупна употреба на земјава ќе биде Република Северна Македонија.

Половина Балкан деновиве е преокупиран со Преспа, а на македонската страна од Преспанското Езеро е мирно и спокојно. Жителите си ги извршуваат секојдневните работи и не сакаат многу да коментираат околу тоа дека по потпишувањето на договорот за името во грчкиот дел на Преспа, државниците ќе дојдат да ручаат на македонска страна.

„Никој не ни кажал дека тука баш кај нас ќе биде. Нема што да кажеме, најдете некој постар, тој повеќе се разбира од политика“, ни рекоа помлади жители од преспанското село Царев Двор.

Постарите пак, велат барајте помлади.

Пет лица биле пренесени во Клиничката болница во Битола по сообраќајна несреќа која попладневно се случила кај Тополчани, на патот од Прилеп за Битола. Сите се надвор од животна опасност, а меѓу нив има и дете, соопшти за Апла.мк, портпаролката на Клиничката болница од Битола, Сузана Конеска.

Новото раководство на Народниот театар од Битола годинава ќе го организира шестото издание на “Битола Шекспир фестивалот“ од 23 до 30 јуни. Иако манифестацијата се роди во време на претходната локална власт и беше еден од клучните културни настани на „Бит Фест“, културното лето што го организираше екс градоначалникот Владимир Талески, сепак фестивалот ќе продолжи да се одржува. Годинава за неговата организација ќе се погрижат Иван Јерчиќ, директор и Илина Чоревска, програмски директор на Народниот театар во Битола.

Од денеска почнува санацијата на ударните дупки на улиците во Битола и руралните средини кои се дел од општината, најави директорот на ЈКП „Нискоградба“, Методи Силјановски.

ВМРО-ДПМНЕ својот 28-ми родненден ќе го слави оваа недела со почеток во 13 часот на плоштадот „Гоце Делчев“ во Битола, дознава Апла.мк од партиски извори.

На роденденот се очекува да присуствува членство и симпатизери од цела Македонија. Збирното место ќе биде во близина на Спортската сала „Младост“, а потоа со дефиле низ битолското Корзо, поворката ќе стигне до плоштадот Гоце Делчев. Таму ќе се одржи партискиот собир, ќе се интонира македонската химна, се очекува да има обраќања и голема роденденска торта.

Членовите на партијата „Граѓанско демократска унија“ од Битола, незадоволни од дејствувањето и ангажманот на градоначалничката, Наташа Петровска, решиле да засадат цветови во дупките на улиците, со цел да и подарат, како што велат, симболичен букет.